ភ្នំពេញ៖ លោក កឹម សុខា បានផ្ញើរសាររំលែកមរណទុក្ខថ្វាយដល់ព្រះអង្គម្ចាស់ក្សត្រី នរោត្តម ម៉ារី រណឬទ្ធិ ព្រះញាតិវង្ស និងសមាជិក សមាជិកា គណបក្សហ៊្វុនស៊ិនប៉ិច ចំពោះការយាងចូលព្រះទិវង្គតរបស់សម្ដេចក្រុមព្រះ នរោត្តម រណឬទ្ធិ។

លោក កឹម សុខា បានសរសេរក្នុងសាររំលែកព្រះមរណទុក្ខថា៖ «ទូលបង្គំខ្ញុំ មានសេចក្ដីរន្ធត់ក្រៃលែង និងសូមចូលរួមរំលែកព្រះមរណទុក្ខជាមួយព្រះអង្គម្ចាស់ក្សត្រី ជាព្រះជាយា ព្រះរាជបុត្រា បុត្រី និងសមាជិក សមាជិកា គណបក្សហ៊្វុនស៊ិនប៉ិច ដោយក្ដីសង្វេកសោកស្ដាយអាឡោះអាល័យជាអនេក ចំពោះការបាត់បង់ សម្ដេចក្រុមព្រះ នរោត្តម រណឬទ្ធិ ដែលជាព្រះស្វាមី ព្រះបិតា និងជាព្រះប្រធាន ជាទីគោរពស្រឡាញ់បំផុត»។

សម្តេចក្រុមព្រះ នរោត្តម រណឫទ្ធិ បានយាងចូលទីវង្គតនៅព្រះជន្មាយុ៧៧វស្សា ដោយព្រះរោគាពាធ ក្នុងប្រទេសបារាំងកាលពីព្រឹកថ្ងៃទី២៨ ខែវិច្ឆិកាម្សិលមិញ។

ព្រះអង្គប្រសូតនៅថ្ងៃទី២ ខែមករា ឆ្នាំ១៩៤៤ គឺជាបុត្រទី២របស់សម្ដេចព្រះនរោត្តម សីហនុ និងអ្នកម្នាង ផាត់ កាញ៉ុល។ ព្រះអង្គធ្លាប់ធ្វើជានាយករដ្ឋមន្ត្រីទី១ ពីឆ្នាំ១៩៩៣ ដល់ឆ្នាំ១៩៩៧ និងបានក្លាយជាប្រធានសភាជាតិពីឆ្នាំ១៩៩៨ ដល់ឆ្នាំ២០០៦៕